JAN LINSI EN SOWELI SULI
open pi tenpo suno wan la jan Linsi li kama lukin e soweli suli lon tomo sama.
ona li toki e ni: “o lukin! soweli suli li lon tomo mi!”
mama meli pi jan Linsi li toki e ni: “lon ala. soweli suli ala li lon tomo. jan ale li sona e ni.”
soweli suli li pana e kon lape tan uta.
tenpo moku la, mama mije pi jan Linsi li toki e ni: “o pana e telo walo soweli tawa mi.”
jan Linsi li toki sin: “mi ken ala. soweli suli li moku e ona ale”
mama mije ona li toki sin: “soweli suli li lon ala. soweli suli ala li lon ma tomo. jan ale li sona e ni.”
soweli suli li pana e kon kalama tan uta.
tomo pi pana sona la jan pi pana sona li toki e ni: “sinpin sitelen pimeja mi li pakala tan seme?”
jan Linsi li toki sin: “ona li sinpin sitelen pimeja ala. ona li soweli suli mi.”
jan sona li toki sin: “soweli suli ala li lon tomo kama sona. jan ale li sona e ni.”
soweli suli li moku e moku pi jan pi pana sona.
tenpo musi la soweli suli li tawa ma musi lon poka pi jan Linsi.
soweli suli li pakala e ilo musi.
jan Linsi li toki e ni: “o weka! sina lon ala. jan ale li sona e ni!”
soweli suli li pilin ike. ona li tawa weka. ona li weka e telo tan lukin ona kepeken nena linja pi sinpin lawa ona.
tenpo pi tomo pi pana sona li pini la, jan Linsi li ken ala lukin e soweli suli.
ona li toki e ni: “soweli suli o! sina lon seme?”
ona li lukin lon kasi. soweli suli li lon ala ni.
jan Linsi tawa tomo ona lon poka pi soweli suli ala.
tomo ona la jan Linsi li wile ala musi li wile ala lukin e lipu, li wile ala lukin e sitelen tawa.
ona li pilin e ni: ona li wan taso.
ona li weka tan tomo li lon anpa li awen.
ona li awen awen.
ni la, ona li lukin e nena linja pi sinpin lawa
e palisa uta tu
e kute suli tu.
soweli suli li kama a!
jan Linsi li tawa ona li luka e ona.
jan Linsi li toki e ni: “mi ike. mi sona e ni: sina lon. sina soweli suli mi.”
soweli suli li sewi e ona. jan Linsi li lon monsi pi soweli suli. ona tu li tawa.
jan Linsi li lukin e jan tu pi tomo poka. jan Linsi li toki e ni: “jan mije Laso o, toki! jan meli Laso o, toki!”
jan mije Laso li toki e ni: “o lukin e jan Linsi! ona li kama sewi kepeken nasin seme? ken la ona li kama suli!”
jan meli Laso li toki e ni: “o nasa ala! jan lili meli li ken ala kama suli sama ni. jan ale li sona e ni.”
soweli suli li tawa telo suli e jan Linsi. ona li kama anpa kepeken nena lawa pi soweli suli.
ona toki e ni: “aaaaaaaaaaaa!”
tenpo suno weka la ona tu li musi. ona tu li pana e kalama pona. ona tu li tawa wawa e telo.
tenpo pimeja la soweli suli en jan Linsi li tawa supa lape. soweli suli li pana e len lape tawa jan Linsi.
jan Linsi li toki e ni: “soweli suli o, o lape pona. tenpo suno ni li pona.”
soweli suli li luka e lawa pi jan Linsi li lape lon poka pi lupa tomo ona.
